Úrslit í ljóðasamkeppni Heiðarskóla 2018

Ljóðasamkeppni Heiðarskóla var haldin í þriðja sinn undir lok skólaársins. Allir nemendur skólans höfðu möguleika á að taka þátt en ljóðin voru flokkuð eftir aldursstigum, 1.-4. bekkur, 5.-7. bekkur og 8.-10. bekkur. Form og umfjöllunarefni ljóðanna var að venju frjálst. 

 

Sigurvegarinn í 1.-4. bekk var Hanna Katrín Eiðsdóttir í 4. HT en hún orti ljóðið Ef ég væri. Sigurvegarinn í 5.-7. bekk var Tristan Einarsson með Molavísur. Ástrós Elísa Eyþórsdóttir í 10. ÞG átti sigurljóðið í 8.-10. bekk sem bar titilinn Óvinur. Öll fengu þau bókaverðlaun á skólaslitunum 5. júní. 

 

Ef ég væri

 

Ef ég væri kanína þá myndi ég hoppa inn í lífið.

Ef ég væri hestur myndi ég skokka inn í lífið.

Ég er manneskja og ég labba inn í lífið.

 

- Hanna Katrín Eiðsdóttir, 4. HT

 

Molavísur

 

Ég þekki kött sem var sætur.

Hann læddist út um nætur.

Stal táfýlusokkum

og nokkrum prjónadokkum.

 

Sá þjófur hét Moli

Og heldur að hann sé foli.

Stundum veiðir hann mýs

og borðar oft ís.

 

- Tristan Einarsson, 5. LE

 

 

 

Óvinur

 

Kvíði er minn versti óvinur,

býr til sár á sál

og herjar á líkamann.

Hann eyðir gleði og býr til tár.

Erfið leið að losna við

til að finna hjartans frið.

 

Baráttan er löng og ströng,

hún sjaldan tekur enda.

Verð víst að sætta mig við

að hann fylgir mér lífið á enda.

 

- Ástrós Elísa Eyþórsdóttir, 10. ÞE